२०११ च्या भारतीय जनगणनेनुसार पारगांव (पिन कोड ४०११०२) या ग्रामपंचायतीमध्ये सुमारे ५५० ते ६५० कुटुंबे वास्तव्यास आहेत. एकूण लोकसंख्या अंदाजे २८०० ते ३००० च्या दरम्यान असून त्यामध्ये पुरुष व महिला यांचे प्रमाण जवळपास समान आहे. गावामध्ये मुख्यतः आदिवासी (वारली) तसेच कुणबी समाजातील लोक राहतात. कुणबी समाजाचा शेती हा मुख्य व्यवसाय असून भातशेती मोठ्या प्रमाणावर केली जाते. आदिवासी समाजातील लोक शेतमजूर, वीटभट्टीमजूर, तसेच बांधकाम क्षेत्रात कामगार म्हणून कार्यरत असतात. याशिवाय काही कुटुंबे कुक्कुटपालन, बकरीपालन व लहान प्रमाणात दुग्धव्यवसाय देखील करतात.
श्रावण महिन्यात, विशेषतः गणपती उत्सवाच्या अगोदरच्या काळात, जेव्हा ढगांचा गडगडाट आणि विजांचा कडकडाट सुरू असतो, तेव्हा पावसाच्या सरींमध्ये एक विशेष नैसर्गिक भाजी रानात उगवते, तिला “अळंबी” असे म्हणतात. ही भाजी अत्यंत चवदार व पौष्टिक असते. अळंबी उगवल्यानंतर ती लगेचच तोडावी लागते, कारण काही वेळातच ती फुलून खाण्यासाठी अयोग्य होते. त्यामुळे गावातील आदिवासी बांधव पहाटे लवकर उठून रानात जाऊन अळंबी शोधतात, ती फुलण्याआधीच खुडून स्वच्छ करून ताजी बाजारात विक्रीसाठी नेतात. पावसाळ्यात हा एक महत्त्वाचा अल्पकालीन रोजगार म्हणून त्यांना उत्पन्नाचा स्रोत उपलब्ध होतो.
